Berriak

2020.05.08

Covid 19ak eraginda egoera berezia ari gara bizitzen. Egoera honetara ahalik eta ondoen moldatu nahian gabiltza guztiok. Gure ikastolak 0-2 bitarteko haurrentzat eskaintza egiten du. Honen inguruan informazioa jaso nahi duzuen familiek lasai deitu 688677819 zenbakira edota zubimusu@ikastola.eus helbidera idatzi. Salbuespen egoera hau amaitzen denean, gure ikastolako ateak irekita izango dituzue eta, nola ez, ikastola bisitatzeko aukera izango duzue.

2020.04.25

Bihartik aurrera haurrek kalera irtetzeko aukera izango dute ordubetez. Tamalez, pandemia oraindik ez dago kontrolpean eta Amasa-Villabonako Udaletik hainbat gomendio prestatu dituzte haurren irteera ahalik eta ordenatuena izan dadin. Familia bakoitzak ahal duen neurrian errespetatzeko ordutegi batzuk eta ibilbide batzuk proposatu ditu udalak. JARRAITU IRAKURTZEN

2020.04.25

Eusko Jaurlaritzako Hezkuntza Sailak aurtengo ikasturtean bizitzen ari garen egoera berezi honetarako aurkeztu duen planari buruzko balorazioa egin du Ikastolen Elkarteak. Adierazi dutenez, egokitzat hartzen da EAEn inork ez errepikatzea etxealdiaren ondorioz, garrantzitsua da hezkuntza errefortzuak, norbanako planak eta curriculum-egokitzapenak aurreikusita egotea planean, eta, halaber, positiboa da ikastetxeei ebaluazio propioa egiteko aukera ematea. JARRAITU IRAKURTZEN.

2020.04.20

Apirilaren 2an amaitu zen Pello Mari Otaño ikerketa beka deialdian parte hartzeko aukera, konfinamendu aroan. Ezohiko egoera aintzat hartuta eta hala egiteko aukera ikusita, antolatzaile garen Kilometroek eta Mintzolak zein babesle diren Zubimusu Ikastolak eta Hernandorena Kultur Elkarteak deialdira aurkezteko epea luzatzeko erabakia hartu dugu. Honenbestez, ikerlan proposamenak ekainaren 19ra arte aurkeztu ahal izango dira, eta ebazpena uztailaren 2an argitaratuko da, beranduenez.

2020.03.16

Gaur egun bizi dugun egoera kontuan hartuta, ikastolako langileriak etxetik lan egingo du. Irakasleek, ikasleekin email bidezko komunikazioa erabiliko dute (LH4tik aurrera) eta bertatik egingo diete jarraipena. Zuzendaritza eta administrazioa ere etxetik arituko da, beraz, ikastolarekin komunikatu ahal izateko bi bide izango dituzue: bat, ikastolako mugikorrera deituz: 688677819 eta bi, emaila erabiliz: zubimusu@ikastola.eus. Lehentasunezko edo presazkoa den zerbait beharko bazenute bi bide horietatik egin dezakezue.

2020.03.10

Aizkardi mendizale elkarteko Ttonttorrez Ttonttor sailak igande honetan Donostian egingo den eskolarteko ibilaldi neurtuan parte hartzeko deia egiten du. Izena emateko 665 731 464 telefonora deitu behar da, osteguna baino lehen. Parte hartzaileak 08:30ean elkartuko dira Villabonako Olaederra kiroldegian eta kotxeetan joango dira Donostiara. Egun erdiko irteera izango da. Gogoratu umeak guraso edo arduradun batekin etorri behar duela irteerara.

2020.03.09

Lilatoia lasterketan bizi izandako esperientzia bikainaren ondoren, beste erronka bat dugu orain eskuartean: Enpresen lasterketa! Enpresen lasterketaren XIII. edizioa da aurtengoa, maiatzaren 17an izango da (10:00etan hasita), Donostian, eta 8,5 kilometroko ibilbidea osatu beharko da, Alderdi Ederren hasi, hiriko hiru hondartzak igaro eta berriz ere Alderdi Ederren amaituz. Zubimusu Ikastolatik bertan parte hartzeko deia egiten dizuegu, guztion artean Kilometroak jaia zein gure ikastolaren izena han eta hemen zabaldu eta elkarrekin Korri, Punpa, Ttak! egiteko. Lasterketan parte hartzeko lau lagunez osatutako taldeak egin behar ditugu: emakumeenak, gizonenak edota mistoak. Zubimusuko langileek zein gurasoek parte hartu ahalko dute. Parte hartu nahi duzuenok bi aukera dituzue: lauko taldea osatu eta taldean izena eman, edo modu indibidualean izena eman. Izena bakarka ematen duzuon artean lauko taldeak osatuko dira. Izena emateko gerturatu, deitu edo bidali mezu bat idazkaritzara maiatzaren 5a baino lehen. Kontuan hartu helburua gure ikastola eta Kilometroak jaia gizarteratzea direla, beraz, animatu eta eman izena!

2020.03.03

Errigorak udaberriaren atarian egiten duen olio eta kontserben kanpaina martxan dago jada, Nafarroa hegoaldeko euskalgintza, ikastolak eta bertako nekazariak babesteko Errigorak egiten duen kanpaina alegia. Hala, martxoaren 12ra arte Nafarroa hegoaldeko oliba-olio birjina estra eta kontserba-loteak eskatzeko aukera dago. Ohiko eskaera ildoari jarraituz, produktu guztien eskaera data berdina izango da, baina banaketa bi zatitan egingo da: olioa apirilean eta kontserba-loteak maiatzean. Aurten ere, produktu guztietan dago produktu konbentzionala edo ekologikoa eskatzeko aukera. Eskaera egin ahal izateko hainbat modu dituzue: Eskaera orria beteta edo ikastolako idazkaritzara deituta edo mezu bat bidalita.

Orriak