Berriak

2019.04.30

DBH 4ko ikasleek bisita berezia jaso dute. Gerrate zibileko aztarnak jasotzen ari diren Joanes Karrera eta Manex Arrastoa historialari eta arkeologoen bisita hain zuzen ere. Aiztondo bailarako trintxeretan indusketa lanak egiten ari dira eta bertatik ateratako bala, kaskilo, botila zatiak, sardexka, labana eta abar eskuartean edukitzeko aukera izan dute. Honez gain, historiako gertaera eta anekdota trajikoen berri izan dute. Historia arloan gai hau landu ostean, burutu da ekintza interesgarria hau.

2019.04.29

Ostirala, maiatzak 3, da Enjoy English programan izena emateko azken eguna. Herritik mugitu gabe jatorrizko ingeles hiztunekin udan ingelesa ikasteko aukera paregabea eskaintzen du Enjoy English programak eta aurreko urteetan bezala, Zubimusu Ikastolak, Ikastolen Elkartearekin bat eginez, ingelesa praktikatzeko aukera eman nahi die ikastolako eta herriko ume guztiei. 

2019.04.15

Justu oporrak hartu aurretik, LH1eko neska-mutilek Lehen Gizakia proiektua landu dute. Ikasgelan gizakiaren sorrera, orduko bizimodua, artea eta beste hainbat alderdi jorratu  ostean,  proiektua borobiltzeko Zubimusu Kobazuloa eraiki zuten. HHko ikasleei zuzenduta bisita gidatuak antolatu zituzten  kobazulora eta haur txikiagoei kobazuloa erakutsi eta azalpenak eman zizkien.

2019.04.15

Ikastolako Mahi-Mahi jangelak askorako eman du bigarren hiruhilekoan eta egunerokotasuna nola bizi duten erakusten duen argazki bilduma osatu dute. Izan ere, erronka kooperatiboak, sukaldaritza tailerra, crossfit saioa… denetarik egin dute jatordu garaian, jangela ikastolaren proiektu pedagogikoan barneratuta baitago. Helburua da osasuntsu jateaz gain, esperientzia berriak bizitzeko aukera ematea gure neska-mutilei. KLIKATU HEMEN ARGAZKIAK ETA JARDUEREN LABURPEN TXOSTENA JAISTEKO

2019.04.13

Goizeko ordu txikietan Korrikarekin bat egin du Zubimusu Ikastolak. Zizurkilen lekukoa ikasleek, Iraiak eta Adeiek,  hartu dute eta Villabonan Nerea Zumeagak, beste lankide batzuekin batera. Ikasle, guraso, irakasle eta langileak batu dira. Emozioa nagusi.

2019.04.12

Ikastolako txikienak Korrika Txikiaz biziki gozatu dute, Korrika beti eta denontzat baita hunkigarria. Eguraldiak aurpegi tristea zuenez, ikastolako jolas-tokian egin dute Klika Korrika! Ikusi bideoa eta argazkiak HEMEN

2019.04.11

Korrika Txikia egin dute Txerminen LH 3, 4 eta 5eko haurrek euskararen aldeko hautua ozen aldarrikatzeko eta Euskal Herrian barrena euskaltzaletasuna sustatzen dabilen martxa babesteko eta txalotzeko. Ordu gutxi falta dira Zizurkilera eta Amasa-Villabonara heltzeko! Ikusi argazki guztiak HEMEN KLIKATUTA

2019.04.11

DBH 3ko ikasleak Villabonako Udalean izan dira EUSKARAREN INGURUAN egindako  lanaren berri ematen. Gelan soziolinguistika eta hizkuntza gutxituen gaia landu ostean, ikerketa soziolinguistikoa egin dute. Euskararen egoera aztertzen aritu dira  talde kooperatiboetan. 

Orriak