2ZIA PROIEKTUA

Zubimusu ikastolan martxan jarri dugun proiektu berria da. 2ZIA, Konfiantzaren Pedagogiaz gain, beste hainbat ereduetatik edaten duen proiektua da. Proiektu honetan ikaslea gaitasunez beteriko izakia bezala ulertzen dugu. Ikaslea bera ikaskuntza prozesuaren ardatza bihurtzen da, haurrarengan sinisten dugulako. Ikasleak bere buruarengan, besteengan eta bere inguruan konfiantza sentitzen duen heinean  bere gaitasunak garatu eta zailtasunak kudeatuko ditu. Irakaslearen egitekoa ikaslearen hezkuntza ibilbidean bidelagun izatea izango da, eta haren gaitasunak, beharrizanak eta zailtasunak deskubritzen laguntzea. Horretarako, baldintza egokiak sortu beharko ditu. Ikastolan diseinatutako espazioetan eta denboran antolaketan haurraren garapen  naturala errespetatuko da. Ikasleari aukera anitzak eskainiko zaizkio autonomia garatzeko, adin desberdinetako haurrekin elkarrekintzan aritzeko eta haurrak berezkoak dituen senak lantzeko.

Ikastola  eraldaketa pedagogiko berritzaile honetan murgildu da. Lehen urratsak Haur Hezkuntzako etapan eta Lehen Hezkuntzako 1. eta 2. mailan ematen hasi da. Euskal Herriko hainbat ikastola ere, buru belarri ari dira proiektu pedagogiko berritzaile honetan. Ondorengo bideoetan ikus ditzakezue 2ZIA proiektuaren esperientzia gure ikastolan, baita Arizmendi Ikastolako Konfiantzaren Pedagogiarena ere.